[The following was copied from a cached version of http://www.humanities.mcmaster.ca/~hyplist/des350.htm, when the latter website was unavailable:]

Source: Eustache DESCHAMPS, éd. Queux de Saint-Hilaire, Paris, Firmin Didot, 1878, t. III, 75-76. Ms. Paris, B.N. fr. 840, f.116.
 
 
Sus! Alarme! Ce dist le Mardi Gras
Au Charnage: nous serons assaillis!
Caresme vient; que ferons nous, helas?
Ce mercredi sera sur le pays,
Dont je voy ja moult de gens esbahis
Et qui delaissent beufs, vaiches et moutons,
Veaulx et aigneaulx, connins, perdriz, chapons,
Cerfs et chevreaulx, pors, bieurre, oeufs et frommaige,
Oes, malars, faisans, grues et paons.
Maudit soit il, et benoit soit Charnage.

Caresme met les povres gens au bas,
Jeuner les fait et estre mal servis,
Et les contraint par griefs labours de bras:
Aux et oingnons, huile de chenevis,
Noix moysies, pommes et pain faitis,
Leur met devant, herbes, choulz et porgons,
Tourteaulx en pot d’orge et de secourgons,
Matin lever pour aler en l’ouvraige.
Merveille n’est se tel tirant doubtons.
Maudit soit il, et benoit soit Charnaige.

Artillerie a dedenz ses cabas,
Harens puanz, poissons de mer pourris,
Puree et poys et feves en un tas,
Pommes cuites, orge mondé et ris.
Dieux! Qu’il a fait de mal aux moines gris
Et aux Chartreux, maintes religions!
Toudis leur fait june et afflictions,
Et a pluseurs tenir povre mesnaige,
Le ventre emfler souvent par ses poissons.
Maudit soit il, et benoit soit Charnaige.

Aux bien peuz fait avoir ventres plas,
Il vuide ceuls que j’avoie raemplis,
Souppe a huile leur donne et l’avenas,
Corde leur çaint, trop leur est ennemis.
.vi. sepmaines sera ses sieges mis.
Ainsis le fait: en Mars est sa saisons
Une foiz l’an; contre lui nous tenons
Vigreusement: May le mettra en caige,
Pasques aussi, nous trois le destruirons.
Maudiz soit il, et benoit soit Charnaige.

Dieux! Qu’il sera le grant sabmedi mas,
Povres, tristes, honteux et desconfis,
Huez com leux, car le dimanche es plas
Yert Charnaige avec ses bons amis;
Harens seront, figues, raisins, honnis;
Porree au lart, pastez, la ne faillons,
Connins, cabriz, oes, tartres et flaons.
Caresme prins tendrons en no servaige;
Eschac et mat a ce jour lui dirons:
Maudis soit il, et benois soit Charnaige.

L’envoy

Princes, ce temps paciamment souffrons,
Prenons en gré pois, harens, courtillaige;
Caresme est brief, nous le desconfirons.
Maudis soit il, et benoit soit Charnaige.